Sangguniang Panlungsod, plano nga magduso sang isa ka ordinansa agud mapahalin ang mga badjao sa Roxas City

ROXAS CITY – Luyag ni City Councilor Midelo Ocampo nga magduso sang isa ka ordinansa nga may katuyuan nga mapahalin ang mga badjao sa Roxas City kag mapabalik sa ila tagsa ka mga puluy-an.

Ini ang nangin sentro sang diskurso-pribilehiyo sang konsehal sa ginpatigayon nga sesyon sang Sangguniang Panlungsod.

Suno kay Ocampo nga indi sang maayo nga ang ginapakita nga imahe sang ginahimo sang mga badjao nga nagapangayo-kayo sa mga tawo sa siyudad.

Ginpahayag pa ni Ocampo nga kun lantawon lamang ang mga badjao, makit-an sa ila panglawason nga mabakod pa ang mga ini kag may kapasidad nga magtrabaho.

Gindugang pa sini nga posible nga ma-impluwensiyahan pa sang mga badjao ang iban nga mga pamatan-on sa siyudad nga magpangayo-kayo man sa mga tawo.