SAPIAN CAPIZ – Padayon pa ang imbestigasyon sang katapo sang Sapian Municipal Police Station sa nagluntad nga pagbungguanay sang angkar-angkar kag motorsiklo sa Sitio Ibilan, Barangay Maninang, Sapian, Capiz.
Matandaan nga dead on the spot ang driver sang motorsiklo nga lalaki nga ginkilala kay alyas “JP”, 25-anyos, residente sang Barangay Bilao samtang pilason naman ang driver sang angkar-angkar nga ginkilala kay alyas “Almer”, 49-anyos kaupod ang tatlo sini ka mga angkas nga lunsay mga residente sang Barangay Poblacion sa nasambit nga banwa.
Sa interview sang Bombo Radyo sa Officer In-Charge sang Sapian Municipal Police Station nga si Police Captain Christine G. Cerbo, ginpahayag sini nga samtang ginasubay nanday alyas “Almer” ang dalan padulong kun tani sa Barangay Poblacion sakay ang Kawasaki Barako 175 pag-abot sa National Highway hinali lamang nga nagpang-agaw sang linya ang driver sang Rusi 125 nga motorsiklo nga ginamaneho ni alyas “JP” nga ila kasugata.
Bangud sa makusog nga impact, nagtabog ang magtimbang nga bahin kag nag-angkon sang patal nga pilas ang driver sang motorsiklo samtang pilason naman ang sakay sang mga angkar-angkar.
Gilayon naman nga ginrespondihan sang katapo sang Sapian Municipal Disaster Risk Reduction and Management Council (MDRRMC) ang sakay sang angkar-angkar agud hatagan sang pauna nga pgbulong antes ginpadangat sa Roxas Memorial Provincial Hospital (RMPH).
Samtang sa Mambusao District Hospital naman ang driver sang motorsiklo agud kun tani hatagan sang nagakaigo nga pagbulong apang gindeklarar ini nga dead on arrival sang doctor.
Mahibaluan nga wala sang headlight ang motorsiklo kag wala suksok nga helmet ang napatay sang natabo ang insidente.
