ROXAS CITY – Ginkumpirmar ni Board Member Jonathan Sonny Besa sang primero distrito nga siya ang magapapili bilang alkalde sa banwa sang Panay sa palaabuton nga eleksyon sa masunod nga tuig.
Sa interview sang Bombo Radyo kay BM Besa, ginsiling sini nga kompleto na ang iya line up kung sa diin mangin Bise-alkalde sini si Panay Vice Mayor Julius Asis, incumbent councilor Luis Asis, Sangguniang Bayan Member Paolo Besa, Lito Barya, Jojo Balgos Mejia, Lacelou Barredo, anay Punong Barangay sang Ilaya Alex Bigcas, Pio Bellosillo kag ang isa ka pwesto nagapabilin nga reserba.
Suno kay BM Besa, isa sa mga rason sang iya pagpapili sa pala-abuton nga eleksyon bangud sa madamo nga mga reklamo ang iya nabaton angut sa ginapahayag nga indi maayo nga pagdumala sang subong nga administrasyon ilabi na ang mainit nga problema kag isyu sa Panay Ville.
Bangud sini, pumuluyo na mismo suno diri ang nagatulod sa iya nga magpadalagan bangud ginpasiguro man sang mga pumuluyo sa banwa sang Panay nga bilog ang ila suporta nga igahatag kay BM Besa.
Kaangut sini, aminado man si BM Besa nga nagalain ang iya buot sa Liberal Party bangud daw kaangay nga wala siya ginarespeto matapos ang pila ka mga meeting nga ginpatigayon nga wala lamang gintawag ang iya presensya.
Samtang, ginklaro man sini nga indi na magbag-o pa ang iya mangin desisyon nga magpapili bilang alkalde sang amu nga banwa.
Matandaan nga 2010 pa sang sudlon ni BM Besa ang politika kung sa diin sa Liberal Party ini naka-linyada.
