ROXAS CITY – Ginkompirmar ni Sangguniang Bayan (SB) Member Paolo Besa nga isa ini sa mga opisyal sang gobyerno sa banwa sang Panay nga nagpamatuk sa pagpasiga sa Panay Christmas Village subong nga COVID-19 Pandemic.
Suno kay Besa nga nagpamatuk ini sa ginpatigayon nga session sang Sangguniang Bayan natuhoy sa pagpasiga sa nasambit nga Christmas Village.
Ginpahayag sini nga nagpain ang LGU sang Panay sang P1 milyones pesos nga pondo para sa pagpasiga sang Chrismas Village subong nga tuig.
Apang, wala ini nagpabor sa desisyon sang lokal nga gobyerno sang amo nga banwa.
Ini bangud sa baylo nga igastos para sa nasambit nga Christmas Village mas maayo nga gingastos na lang kuntani ini para sa COVID-19 response ukon vaccines subong nga pandemya.
Mahibaluan nga mas ginpili sang LGU nga magpasiga sang Christmas Village agud mabuligan man ang mga negosyante kag mapasanyog ang ekonomiya sa nasambit nga banwa.
Aminado man si Besa nga nadismaya ini bangud sa nakita nga mga laragway sa social media nga madamo sang mga tawo ang wala nagasunod sang mga minimum health protocols kapareho sang social distancing, pagsuksok sang faceshield kag facemask.
Gani, gindugang pa sini nga mas maayo na lamang nga isuspinde ang pagpasiga sang Christmas Village agud man malikawan ang pagkadto sang mga tawo kag paglapta sang virus.
Dugang pa sini nga indi naman masarangan sang mga 12 PNP personnels ang pagbantay sang seguridad sa palibot bangud sa tuman ka-damo sang mga tawo nga nagapadulong.
Matandaan nga ginpakamaayo na lamag sang LGU sang amo nga banwa nga i-resume ang pagpasiga sang Panay Christmas Village alas 10 sa gab-i.
