Nagpaathag ang isa ka Sangguiang Bayan member sa banwa sang Sapian, Capiz
angut sa iya pagdala pauli sa asawa nga nagpositibo sa antigen test sa ila puluy-an.
Ginpahayag ni SB member Jonathan Gallardo nga wala ini sang intensyon nga ipalagyo ang tiayon nga isa ka medical technologist sa Mambusao District Hospital nga naglain ang pamatyag.
Matapos nagguha ang resulta sang antigen test, ginpanugyanan sila nga dalhon sa Roxas Memorial Provincial Hospital ukon sa isolation room sang Mambusao District Hospital ang ginang.
Suno sa SB member nga indi lipod sa iya ang kakapoy na sang mga medical frontliners sa RMPH gani posible nga indi mahatagan sang maayo nga management ang sitwasyon sang asawa.
Nagsuhestyon pa si Gallardo nga sa pribado nga ospital dalhon ang iya tiayon agud makapahuway ini sang maayo.
Apang ginpahangup sa iya sang doktor nga ang RMPH lamang sa probinsiya sang Capiz ang referral hospital sang mga COVID-19 patients.
Nahibaluan nga ginpasulod sa isolation room ang asawa ni Gallardo apang nakita sini nga kasubong indi mahim-os kag nabudlayan sa lugar ang asawa rason nga nagtuyo ini nga makig-estorya kay Dr. Ian Arciga.
Apang sang nagdugay sang 30 minutos kag wala pa nagpanaug si Dr. Arciga, nagdesisyon si Gallardo nga dalhon na lamang sa ila balay ang asawa.
Ginpahayag pa ni Gallardo nga isa lamang ang luyag sini matabo kag ini nga mag-ayo ang iya asawa.
Gingarantiya man sini sa mga Sapianon nga indi maglapta ang nasambit nga virus sa ila lugar bangud humalin nga nag-abot sila sa ila balay, wala na sila nakaguha nga magpamilya kag nagtenir na lamang sa sulod.
Ginpasalamatan man ni Gallardo ang pila ka mga abyan nga nagpadala sang pagkaon sa ila balay.
Daku man ang nabulig sa ila sang anak nga isa ka nurse sa Amerika, bangud ini ang nagatudlo sang dapat himoon agud ila ma-manage sang maayo ang sitwasyon labi na sa kondisyon sang iya iloy.
Samtang nagpamat-ud si Gallardo nga pananglitan mangin positibo sa swab test ang tiayon, magatenir na lamang sila nga magpamilya sa sulod sang ila balay.
