Padayon pa nga ginahibalo sang mga otoridad ang rason sa kamatayon sang lalaki nga nasapwan-patay sa Barangay Banica, Roxas City.
Sa interview sang Bombo Radyo kay Police Lieutenant Colonel Rogelio Tomagtang, Jr., hepe sang Roxas Component City Police Station, iya ginpahayag nga ginapadalman pa sang Scene of the Crime Operation (SOCO) ang insidente.
Suno kay Tomagtang, ang nasambit nga mga awtoridad ang makatumod kun bala may yara ukon wala sang foul play sa kamatayon sang biktima.
Ginpahayag sini nga yara na sa advanced state of decomposition ang bangkay sang biktima sang masapwan sa lugar.
Dugang pa sang natungdan, dako man ang mangin bulig sang closed circuit television (CCTV) sa lugar agud matumod ang identity sini.
Una naman nga ginpahayag sang mga witness sa lugar nga ginapatihan man nga ang napawaty amo ang lalaki nga nagaliho-liho sa dalan kag residente sang Barangay Culajao, Roxas City, apang padayon pa nga gina-verify.
