Ginpaguwa na sang Department of Education (DepEd) ang opisyal nga school calendar para sa School Year 2026-2027.
Suno sa DepEd, magaumpisa ang klase sa Hunyo 8, 2026 kag matapos sa Abril 8, 2027. May kabug-usan nga 201 ka adlaw ang school year nga tungaon sa tatlo ka termino.
Kabahin sang reporma ang pormal nga pagpatuman sang three-semester system agud mapauswag ang pagtudlo kag matapna ang learning gaps sang mga estudyante.
Sa kada termino, may opening period, instructional phase kag end-of-term activities. Ang first term magaumpisa Hunyo 8 tubtob 11, nga sundan sang regular classes sa Hunyo 15 kag magatapos sa Setyembre.
Ang ikaduha nga termino magaumpisa sa tunga sang Setyembre tubtob sa una nga mga semana sang Disyembre antes ang holiday break.
Samtang ang ikatatlo nga termino magaumpisa sa Enero kag magatapos sa katapusan nga semana sang Marso, nga sundan sang final assessments kag closing activities sa Abril 2027.
