ROXAS CITY – Pilason ang duha ka mga driver sang motorsiklo matapos nga magbungguanay sa Barangay San Jose, Dumalag, Capiz, kahapon nga adlaw, Mayo 5.
Ginkilala ang driver sang Suzuki raider kay Felipe Ferrer, sa legal nga pang-edaron kag residente sang Barangay Concepcion.
Samtang ang driver sang Honda ADV nga motorsiklo ang ginkilala kay Reniel Gañaca, 27-anyos, seafarer kag residente sang Barangay Sto. Angel, lunsay mga taga-banwa sang Dumalag.
Sandig sa impormasyon nagikan sa mga katapo sang Dumalag MPS, nga samtang ginasubay sang driver sang raider ang dalanon nagikan sa Poblacion proper kag paliko kuntani sa San Jose sa may patyo agud magsindi sang kandila sa iya nagtaliwan nga himata, sang nabungguan ini sang nagasunod nga motorsiklo nga ginamaneho sang nasambit nga persona.
Bangud sa impact sang pagkabunggo, lunsay nag-angkon sang kapilasan sa lawas ang duha ka mga driver.
Ginpadangat sa Tapaz District Hospital si Ferrer, samtang sa Dao District Hospital si Gañaca, nga lunsay yara na sa istable nga kondisyon.
Nagapadayon ang imbestigasyon angut sa aksidente.
