Nagreklamo ang isa ka seaman matapos nga gin-akusaran sang mga tanod nga nangawat sang manok sa Sitio Sentro, Barangay Dinginan Roxas City.
Ginkilala ang nagreklamo kay alyas “Robert”, 42-anyos kag residente sang Alba Village, Brgy. Dinginan, Roxas City, samtang ang ginatudlo naman sini nga mga suspetsado ang ginkilala kanday alyas “Ruben” kag alyas “Joemarie”, lunsay yara sa legal nga pang-edaron, BPAT member kag residente sang nasambit nga lugar.
Sa nakuha nga impormasyon sang Bombo Radyo nagikan sa Roxas City PNP, ginpahayag nga samtang naga-bike ang biktima halin sa highway sang Pueblo de Panay padulong sa ila puluy-an, nag-desider ini nga magpundo bangud ginatawag ini sang kalikasan. Nagpwesto ini sa isa ka lote apang hinali naman nga nag-abot sa lugar ang isa ka traysikol sakay ang tatlo ka persona kag sa wala matumod nga rason ginpalapitan sang mga ini ang biktima kag gin-akusahan nga nagapangawat sang manok.
Gilayon man nga nag-abot ang Barangay Mobile Patrol sang nasambit nga barangay kag ginapahayag nga ginsumbag ni Joemarie si Robert sa likod, gin-testingan pa nga makadalagan sang biktima apang nadakpan ini kag gindala sa sulod sang nasambit nga Patrol, ginposasan kag ginkuha ang iya cellphone. Ginaalegar nga ginsumbag pa suno ini ni Ruben kun sa diin naigo ini sa tuo sini nga mata. Ginaalegar man sang biktima nga ginbutangan sang mga tanod ang iya bike sang manok bilang planted nga ebidensya.
Gindala ang biktima sa Roxas City PNP kag gilayon naman nga ginturn-over sa iya ang cellphone sini nga ginkuha sang mga tanod.
