ROXAS CITY – Padayon nga ginabulong sa ospital ang 47-anyos nga seafarer matapos ginluthang sang duha ka wala pa makilala nga kalalakinhan nga nagasakay sa motorsiklo sa Sitio Arcabalo, Barangay Bolo, Roxas City.
Ginkilala ang biktima nga si Jose Harold Taburnal nga nag-angkon sang samad sa nawala nga paa.
Nagaguwa sa imbestigasyon sang Roxas City PNP nga matapos nag-inum ang biktima sa balay sang amay nga si Sulpicio Taburnal, nagpauli ini sakay sa motorsiklo.
Nakaabot lamang sa ila balay si Taburnal kag buot na nga magpanaug sa motorsiklo sang nakabati sang asud asod nga lupok sang armas sa diin sang iya balikdon nakita sini ang duha ka mga kalalakinhan nga nagasakay sa motorsiklo.
Matapos narealisar sang biktima nga naigo siya sa nawala nga paa, gilayon ini nga naglumpat sa motorsiklo kag nagpanago sa kanal.
Nagpalupok pa sang makapila ka beses ang mga suspek antes nagbiya sa lugar.
Gilayon nga gindala sa ospital si Taburnal agud madapatan sang pagbulong ang naangkon nga samad.
Sa pagresponde sang kapulisan sa ginluntaran sang insedente, nakarekober sila sang pito ka empty shells sang .45 kalibre nga armas kag duha ka slug sang amo nga pusil.
Nadiskubrehan man ang duha ka mga buho sa gate sang balay sang biktima.
Daku nga palaligban sa karon kun sin-o ang nagluthang kay Taburnal, bangud ginapanindugan sini nga wala siya sang kaaway para may magtuyo sang malain sa iya kabuhi.
Padayon sa karon ang imbestigasyon sang kapulisan sa nagluntad nga insedente.
