ROXAS CITY-Padayon sa karon ang ginapatigayon nga search and rescue operation sang mga otoridad natuhoy sa ginaalegar pagkalumos sang 46-anyos nga seafarer sa Malibong River sa Barangay Dolores, Dumalag Capiz.
Ang biktima ang ginkilala nga si Marnel Bulahan,residente sang nasambit nga lugar.
Sandig sa imbestigasyon sang Dumalag Municipal Police Station sa pagpanguna ni Police Staff Sergeant Marfred Faduga ginpahayag sini nga matambok kun tani ang biktima sa suba agud mag-sabud sang iya nga mga manok napahamtang sa tabok sang nasambit nga suba.
Apang wala sini natalupangdan nga gulpi lang nga nagtaas ang lebel sang tubig bangud sa mamunog nga ulan rason nga gin-anod si Bulahan sang tubig.
Nakita pa sang iya mga himata ang nabilin sini nga butas apang ang biktima ang wala gid makita.
Nagalaum ang pamilya ni Bulahan nga yara ini sa hilway nga kahimtangan.
