MANILA, Philippines – Ginpahayag sang Securities and Exchange Commission ukon “SEC” nga himuon na nila nga bug-os nga online ang proseso sang aplikasyon para sa mga public offerings bilang kabahin sang tikang sang ahensya nga mapadasig ang pagtipon sang kapital sang mga kompanya pinaagi sa Philippine capital market.
Sa pahayag sang SEC, ginpaguwa nila sang Hunyo 9, 2026 ang draft memorandum circular nga nagamando sa paggamit sang Online Application for Registration Statements ukon “OARS”, isa ka web-based platform nga magadumala sa electronic nga pagsumiter sang registration statements kag iban pa nga kinahanglanon nga dokumento para sa public offerings.
Suno sa SEC, pinaagi sa OARS ang processing period sang aplikasyon tubtob sa 40 ka adlaw, nga magahatag sang mas madasig nga serbisyo sa mga nagapangayo sang pag-aprubar.
Sa nahauna nga bahin sang implementasyon, batunon sang sistema ang mga aplikasyon para sa registration sang securities pinaagi sa direct public offerings, follow-on offerings, initial public offerings ukon IPO, kag first-tranche shelf registrations.
Lakip man sa sakop sang platform ang mga aplikasyon sa idalum sang espesyal nga programa sang SEC nga nagadumala sa pagpalapnag sang kapital para sa real estate non-traditional securities kag sa operators sa power generation, wholesale electricity kag retail services.
Dugang pa sang SEC, ang OARS indi lamang para sa pagsumiter sang aplikasyon kundi magabulig man sa pag-isyu sang international securities identification numbers, pagklasipikar sang financial instruments kag paghatag sang financial instrument short names suno sa mga internasyonal nga pamantayan.
Suno kay SEC Chairperson Francis Lim, kabahin ini sang padayon nga pagbalhin sang ahensya padulong sa isa ka paperless kag data-driven nga regulasyon nga sistema.
Ginpabutyag man ni Lim nga paagi ini agud mapahapos ang proseso sang aplikasyon kag mapakunhod ang mga burukratikong balabag nga mahimo makapadasig sa mas madamo nga mga kompanya nga magsulod kag magpamuhunan sa merkado sang kapital sa Pilipinas.
Sa karon, ginapasugtan pa ang publiko nga makahatag sang ila mga komento sa draft circular, samtang ginapaidalum man ini sa user acceptance testing antes ang bug-os nga implementasyon sang bag-ong online platform.
