Pormal nga naghingyo si Second District Congresswoman Inday Baby Jane Castro sang gilayon nga pag-untat sang kontrata sang AD Pendon Construction may kaangtanan sa mga proyekto kaangay sang Concreting of Road sa Batobato, Mambusao, Capiz kag Widening of Ibian Bridge sa bahin sang Barangay Mianay, Sigma, Capiz.
Nagahingyu man sang gilayon nga pagtalana sang bag-o nga contractor pinaagi sa District Engineering Office sang Second District agud masiguro ang madali nga pagkahuman sang mga proyekto.
Tinutuyo sang amo nga tikang nga malikawan ang dugang nga perwisyo kag masiguro ang kaluwasan sang publiko bangud sang madugay nga kahimtangan sang nasambit nga mga proyekto.
Sa subong, ginahulat pa ang sabat kag aksyon sang District Engineering Office para masugdan ang nagakaigo nga tikang agud mapadayon ang mga proyekto sa pinakamadali nga tion.
