ROXAS CITY – Nagpanindugan ang barangay secretary kag treasurer sang Barangay Milibili, Roxas City nga wala gid sang mga dokumento nga gintugyan sa ila ang administrasyon ni anay Punong Barangay kag karon City Councilor Midelo Ocampo sang nagpungko ang bag-o nga administrasyon ni Punong Barangay Annabelle Roxas.
Suno kay Barangay Secretary Chasisa Bernabe, sumugod sang nagpungko sa amo nga pwesto sadtong Hulyo 1, wala na sang unod nga mga dokumento ang mga cabinets sa ila barangay.
Suno pa diri nga mangin ang files sa computer ang ginpangdelete na man rason nga nabudlayan ini sa pagsugod sa iya nga trabaho.
Suno diri nga wala siya sang format sa halos tanan nga dokumento sang barangay kapareho sang barangay clearance kag certification rason nga nagpangayo ini sang bulig sa City Planning Office.
Ginpahayag man sini nga luyag man kuntani nila magpasakop sa Lupong Tagapamayapa Incentives Award-Component City Category sang Department of Interior and Local Government (DILG) apang madamo sang kulang sa ila dokumento ilabi na ang wala maturn-over sa bag-o nga administrasyon.
Suno naman sa Barangay Treasurer nga si Josephine Villarisco, wala man sang pormal nga gintugyan sa iya nga anuman nga dokumento rason nga kasubong nagpangarapkap pa ini sang nagsugod na ang iya trabaho.
Suno sa iya nga nagpalapit man siya sa anay treasurer sang ila barangay nga iya ginbuslan kag ginhambalan siya nga magpangayo na lamang sang mga kopya sang dokumento sa City Budget Office butang nga ini man nga ginhimo.
