Ginpahugtan sang Securities and Exchange Commission (SEC) ang mga kinahanglanon sa pag-audit para sa mga kumpaniya nga naga-uyat sang mga kontrata sang gobyerno sa tunga sang ginpabaskog nga imbestigasyon sa kontrobersyal sa flood control scandal.
Sa idalom sang SEC Memorandum Circular No. 26, Series of 2026, gin-amyendahan sang regulator ang mga pagsulundan sa akreditasyon agud mapabakod ang kalidad sang evaluation kag masiguro ang pagkatampad sa financial reporting sang mga kontraktor.
Ang mga kumpaniya nga may isa ka kontrata sa gobyerno nga nagasobra sa P750 million ukon kabug-usan nga kontrata nga nagasobra sa P1 billion ang kinahanglan nga mag-hire sang isa ka Group A accredited independent external auditor.
Samtang ang mga may kontrata nga nagabalor sang P400 million tubtub P750 million ang kinahanglan nga mag-hire sang Group B auditor agud ma-review sang maayo ang ila financial records.
Ang mga korporasyon kinahanglan man nga magsumiter sang isa ka notarized schedule nga nagaunod sang mga detalye, balor, kag status sang tagsa ka proyekto nga ginasakop sang opisyal nga report sang auditor.
Magasugod nga ipatuman ang bag-o nga mga pagsulundan sa mga audit sang financial statement para sa mga fiscal period ukon pagkatapos sang Hunyo 30, 2027.
