ROXAS CITY – Dismayado ang pila ka mga security guards sang Tres Niñas Security Agency matapos ginterminate sila sa ila trabaho nga wala sang pauna nga abiso.
Ginpahayag ni Cris Eustaquio sang banwa sang Cuartero nagdangup sila sa Bombo Radyo Roxas agud magpangayo sang bulig kag mahatagan sang aksyon ang ila reklamo bangud nadulaan sila sang palangabuy-anan.
Suno sa tagreklamo nga Marso 31, 2021 sang gintawagan sang ahensiya nga last day na ini sang iya duty bilang security guard sang isa ka subdibisyon sa Barangay Cagay.
Gintuad ni Eustaquio nga luyag sang tagdumalahan sang security agency nga kun mag-off duty sila, magapanghagbas kag magapanghilamon sila sa bilog nga subdibisyon bilang kabahin sang ila trabaho.
Aminado si Eustaquio nga ila lamang ginamentenar ang entrance ukon nauna nga bahin sang subdibisyon kag wala ini maluyagan sang agency.
Ginpromesahan man sila sang insentibo apang wala nagtupa.
Nagpanindugan pa ang tagreklamo nga wala ini malakip sa ila job description bangud security guard ang ila gin-aplayan nga trabaho kag indi utility.
Nagpaathag pa ini kun magpanghagbas pa sila sa ila nga off duty, wala na sila sang pahuway bangud 12 oras ang ila nga trabaho.
Samtang handa pamatud-an sang mga tagreklamo nga nagasugid sila sang matood kag mabakud nga ebedensiya ang ila ginauyatan nga Duty Detail Order (DDO) nga nagapakita sang ila nga schedule kag assignment bilang security guards.
