Personal nga gin-atubang ni DOLE Secretary Silvestre Bello III ang tag-iya sang isa ka security agency sa Roxas City nga ginreklamo sang mga security guards bangud sa kapaslawan nga mahatag sa ila ang ensakto nila nga sweldo, overtime kag night differential pay.
Matapos ang ginpatigayon nga hearing sa DOLE office sa tunga sang security agency kag mga security gaurds, ginpahayag ni DOLE Secretary Bello ginpakadto siya ni President Rodrigo Duterte matapos nakalab-ot diri ang reklamo sang mga sekyu.
Sa imbestigasyon sang Regional Office sang DOLE, nakumpirma nga indi ensakto ang ginabayad nga sweldo sang nasambit nga security agency sa dose oras nga duty sang mga sekyu, magluwas pa diri ang wala pagbayad sang overtime kag night differential sang mga tagreklamo.
Ginmanduan sang tiglikum ang tag-iya sang security agency nga bayaran sini ang mga wala nabayaran nga benepisyo sang mga sekyu bangud kun indi, maga-isyu ini sang compliance order.
Kun magpakatig-a ang tag-iya suno kay Bello maga-isyu ini sang writ of execution.
Nagpromesa naman ang tag-iya nga maga-comply sa order ni Bello kag naghinyo lamang nga i-recompute ang sweldo kag iban nga mga benepisyo sang mga sekyu antes sila magbayad.
Sa pihak nga bahin, nagpanagtag sang tseke sa idalum sang Tulong Panghanapbuhay sa Ating Disadvantaged/Displaced Workers ukon TUPAD program sang DOLE si Secretary Bello.
Kalakip sa nakabaton sang tig P1.4 million sa TUPAD program sang ahensiya amo ang Roxas City government kag Local Government Unit sang banwa sang Tapaz.
Samtang ang LGU-Mambusao kag Provincial Government sang Capiz ang nagbaton sang P10 million para sa cash for work program sang DOLE.
Magluwas diri may 100 ka mga baroto nga ipanagtag sang ahensiya sa mga mangingisda nga nadulaan sang sakayan.
