ROXAS CITY – Dakop ang isa ka sekyu nga sakay sa tricycle matapos nga nakuhaan sang kutsilyo kag ginapatihan shabu sa Barangay Baybay, Roxas City.
Ginkilala ang nadakpan nga si Manuel Roa sang Barangay Dumulog sining siyudad.
Base sa imbestigasyon sang Roxas City Police Station nga nagasakay sa sulod sang tricycle ang suspek kaupod ang tatlo ka mga indibidwal sang ginsita ang mga ini sang mga tanod kag ni Police Master Sergeant Mark Acejo ang driver sang tricycle nga si Jacob Peral Jr., sang kaaganhon kun sa diin nagikan sa city proper.
Apang, sa interview sang Bombo Radyo sa mga pamatan-on nga sanday Antonette De Onor 19-anyos sang Brgy. Mongpong; Ma. Theresa Oro 22-anyos kag Tristan Aniero 19-anyos nga lunsay mga residente sang Bayot Drive sining siyudad nga indi nila kilala si Roa.
Ginapahayag nga wala sila kahilabtanan sa amo nga suspek bangud nagsakay lamang sila kag magapauli sa Barangay Culasi sining siyudad.
Mahibaluan nga samtang ginausisa sang tanod kag pulis ang driver sang tricycle indi naman mahim-os ang suspek kun sa diin nagahana ini nga may kuhaon sa iya bulsa rason nga ginpapanaog ini sa tricycle kag narekober ang kutsilyo kag duha ka ginapatihan nga shabu.
Bangud diri, gindakop ang suspek kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
