Security guard pilason matapos mabungguan sang ginamaneho nga motorsiklo ang nagtabuk nga ido sa dalanon

ROXAS CITY – Pilason ang isa ka security guard matapos aksidente nabungguan ang isa ka layaw nga ido sa Barangay Cagay, sining syudad.

Ginkilala ang biktima nga si Simeon Tono 40-anyos sang Barangay Dapdapan, Sapian, Capiz.

Sandig sa imbestigasyon sang kapulisan samtang ginasubay sang biktima ang dalanon sa Barangay Cagay pauli na kuntani sa ila balay sang hinali nagtabuk ang isa ka ido.

Nadulaan sang kontrol sa ginamaneho nga motorsiklo ang biktima kag natumba sa dalanon.

Gilayon naman nga nagresponde ang mga katapu sang Special Rescue Unit sang Bureau of Fire Protection kag gindapatan sang pauna nga pagbulong ang naangkon nga kapilasan sa lawas ni Tono antes gindala sa ospital.

Samtang napatay ang ido nga aksidente nabungguan sang biktima.