Plastado na ang security plan sang Roxas Component City Police Station para sa pagbalik-eskwela sang mga estudyante para sa School Year 2026-2027.
Sa interview sang Bombo Radyo kay Police Lieutenant Colonel Rogelio L. Tomagtang Jr., Officer-in-Charge sang Roxas Component City Police Station, iya ginpahayag nga may yara sang duha ka pulis nga iga-deploy sa kada eskwelahan agud masiguro nga malinong kag matawhay nga pagbukas sang klase.
Suno kay Tomagtang, pinaagi sa koordinasyon sang kapulisan sa mga barangay officials kag sa Traffic Management Unit (TMU), mas mapabakod ang pagpatuman sang seguridad kag kaluwasan sang mga estudyante, ginikanan, kag mga manunudlo sa tion sang pagbukas sang klase.
Nagpanawagan ang natungdan sa mga ginikanan nga updan kag iga-assist ang ila mga kabataan, ilabi na ang elementary nga estudyante.
