ROXAS CITY – Ginpasiguro sang alkalde sang banwa et Sapian ang seguridad kag kaluwasan sang mga magatambong sa Tilibyugan Festival 2024.
Sa interview sang Bombo Radyo kay Mayor Joe Villanueva, alkalde sa nasambit nga banwa, ginpahayag sini nga nagpatigayon ini sang pila ka pagsinapol sa mga kapulisan para sa safety sang mga magatambong sa amo nga kapiyestahan.
Dugang pa sini nga nakapakig-angut naman ini sa mga tanod sa tanan nga barangay sa amo nga banwa kag sa pila ka mga ahensya sang gobyerno nga magabulig sa peace and order.
Samtang, ginpakigbahin man sang alkalde ang kahulugan sang Tilibyugan nga amu ang paghiliusa kag paghugpong sang mga Sapianon kun sa diin amo man ang tema sang nasambit nga selebrasyon.
Angut sini, naghimo ang kada barangay sang mga arko nga ginpahamtang sa Poblacion sang banwa kun sa diin ginarepresentar diri ang tagsa ka mga produkto.
Tinutuyo sang amo nga buluhaton agud nga makit-an ang pagtilibyog ukon paghiliusa sang mga Sapianon kag subong man makilala ang banwa sang Sapian.
Balantayan man suno sa alkalde ang mga nakalinyada nga mga activities halin Hulyo 20 tubtob 26 kun sa diin adlaw-adlaw may mga aktibidades nga ginpreparar.
Dugang pa sini nga may mga artista man nga magapadulong sa amo nga selebrasyon kag ang pinaka-highlight diri amo ang inagurasyon sang newly expanded and renovated nga municipal hall sang nasambit nga banwa.
Samtang, ginaagda man ni Mayor Villanueva ang tanan nga Capisnon kag mga bisita nga magtambong sa Tilibyugan Festival 2024.
