Ginatapos na sang Philippine National Police (PNP) ang ila security preparations para sa pagsugod sang impeachment trial ni Vice President Sara Duterte sa Senado.
Suno kay PNP Chief nga si Jose Melencio Nartatez Jr., ginaplantsa na sang kapulisan ang tanan nga kinahanglanon nga tikang agud masiguro ang malinong kag matawhay nga pagpatigayon sang impeachment proceedings.
Ginpahayag man niya nga indi lamang ang National Capital Region Police Office (NCRPO) ang mabantay sa palibot sang Senado kundi may iban pa gid nga mga yunit sang PNP nga iga-deploy agud mapabilin ang kaayusan kag seguridad sa lugar.
Makigkoordinar man ang PNP sa Senate Sergeant-at-Arms para sa mga security measures sa sulod kag guwa sang Senado. Magahatag man sila sang proteksyon sa mga miyembro sang prosecution panel paagi sa koordinasyon sa House Sergeant-at-Arms, kag handa man maghatag sang security assistance sa mga abogado sang depensa kon kinahanglanon.
Suno pa sa PNP, ila nahibaluan nga mahimo magdala sang mabaskog nga emosyon kag nagkalain-lain nga reaksyon sa publiko ang impeachment trial. Bangud sini, ila nga ginahingyo ang tanan nga magpabilin nga malinong samtang ginapasiguro sang kapulisan ang seguridad kag kaluwasan sang publiko sa bug-os nga proseso
