ROXAS CITY – Nagparekord sa Roxas City Police Station ang isa ka sekyu matapos ginaalegar ginpahog kag ginbastos sang isa ka nagpakilala nga miyembro sang Philippine Drug Enforcement Agency (PDEA) sa Barangay Banica, Roxas City.
Ginkilala ang tagreklamo nga si Michael de Jungoy, 27 anyos kag residente sang Graceville Subdivision, Barangay Tiza, sining siyudad.
Base sa ginpabalhag sang tagreklamo, ginaharass ini sang suspek nga si Martin Bering kag nagapamahog pa sa iya.
Sa pihak nga bahin, ginreklamo man si Bering sang isa ka 49 anyos nga si Mary Jean Abellar matapos nga ginpatu-patuan ini sang suspek nga imbulbado sa baligyaanay sang ilegal nga droga kag ginpahayag pa nga ginagamit ang ila salakyan sa ilegal nga buluhaton.
Base sa ginpabalhag ni Abellar, nagpadulong sa iya ang isa niya ka abyan kag ginpakita ang chat ni Bering nga ginaangut siya sa pagduso sang ilegal nga droga.
Dugang pa nga alegasyon ni Abellar nga nagagamit si Bering sang iban nga pangalan kag mga laragway sa iya pagpamahog.
