ROXAS CITY – Simple apang memorable ang nangin selebrasyon sang ika-122 ka tuig nga anibersaryo sang Philippine Independence Day ukon Adlaw sang Kahilwayan sa probinsiya sang Capiz.
Matapos ang dululungan nga flag raising ceremony sang syudad sang Roxas nga ginpangunahan ni Roxas City Mayor Ronnie Dadivas, ginsundan ini sang wreath laying sa monumento ni Dr. Jose Rizal sa pagpanguna naman ni Governor Esteban Evan Contreras II.
Suno kay Governor Contreras nangin simple lamang ang nasambit nga kahiwatan agud mapatuman ang minimum health protocol.
Sa mensahe sang gobernador, ginpahayag sini nga daku ang nangin papel sang mga baganihan agud maangkon sang Pilipinas ang independensiya sa diin bisan simple lamang ang selebrasyon, ang importante nga mapakita ang appreciation, pagrespeto, pagsaludo kag pagpasalamat sang publiko sa mga sakripisyo sang mga baganihan.
Sa karon man nga henerasyon, ginakabig nga baganihan ang mga frontliners nga nagarisgo sang ila kabuhi agud lamang indi maglapta ang COVID-19 disease.
