Ginpahayag sang isa ka legal expert nga kinahanglan anay magpasungka ukon magpaaresto si Senador Ronald “Bato” dela Rosa antes siya makapangayo sang bulig ukon judicial relief sa Korte Suprema may kaangtanan sa warrant of arrest nga ginpagwa sang International Criminal Court ukon ICC.
Suno kay Atty. Jose Roy III, klaro sa Rome Statute nga mahimo lamang madala sa lokal nga korte ang kaso kon naaresto na ang persona nga may ICC warrant. Gani para sa iya, dapat sundon anay ni Dela Rosa ang proseso antes siya dumulog sa korte sa Pilipinas.
Nagguwa ini kasunod sang pahayag sang kampo ni Dela Rosa nga indi dayon mahimo mapatuman ang ICC warrant kon wala sang basbas ukon warrant gikan sa lokal nga hukuman. Apang wala ini ginpati-an sang pila ka legal experts bangud mahimo naman magbag-o ang legal nga sitwasyon kon maaresto na ang isa ka Pilipino kag madala sa iban nga pungsod.
Sa pihak nga bahin, ginpahayag naman ni Atty. Israelito Torreon nga gusto sang kampo ni Dela Rosa nga maubos anay ang tanan nga legal remedies antes nila atubangon ang isyu sa ICC.
