Ginsita ni Senator-judge Pia Cayetano ang prosecution matapos ma-display sa screen ang isa ka dokumento halin sa Bureau of Internal Revenue ukon BIR sa ginpatigayon nga impeachment proceedings.
Suno kay Cayetano, dapat anay naghulat ang prosecution kag technical team sa desisyon sang impeachment court antes ginpakita sa publiko ang nasambit nga dokumento.
Ginpahayag ni Cayetano nga subject pa sa debate sang mga senador-judge ang amo nga dokumento kag ang posibilidad nga ipakita ini sa proceedings. Ginquestion man niya kon ngaa gin-display ini sa screen sulod sang ginbana-bana nga 20 tubtob 30 segundos.
Samtang, ginpahayag ni Presiding Officer Chiz Escudero nga gilayon nga ginkuha sa screen ang summary table sang dokumento matapos ang pag-objection ni Cayetano.
Ang insidente nagluntad samtang ginahulat pa sang impeachment court ang desisyon kon mahimo bala nga ipakita sa publiko ang amo nga dokumento halin sa BIR.
