ROXAS CITY – Nagpromesa si Senator Christopher Lawrence Bong Go nga magahatag ini sang dugang nga P5 milyones gikan sa iya opisina para sa dugang nga pondo sang Malasakit Center sa Roxas Memorial Provincial Hospital.
Ini ang ginpahayag ni Governor Esteban Evan ‘Nonoy’ Contreras II sang mainterview sang Bombo Radyo.
Suno kay Contreras nga tuman ang iya nga kalipay kag pagpasalamat bangud ang nasambit nga ayuda ang dako nga bulig para sa mga Capizeño.
Sa karon, indi pa mabal-an kun san-o ihatag ni Bong Go ang ginpromesa nga pondo para sa probinsya apang ginalaoman na ini sang gobernador.
Sa pihak sini, ginpasalamatan man ni Contreras si Presidente Rodrigo Duterte kag ang nasambit nga senador bangud sa suporta kag pagpalangga nila sa mga Capizeño rason nga nagpa-in sila sang pondo para sa Malasakit Center.
Suno pa sa gobernador nga isa sa mga adbokasiya sini ang paghatag sang serbisyo medikal agud masiguro ang ikaayong lawas sang mga pumuluyo.
Pagatinguhaan man sini nga malab-ot ang target nga wala sang pagabayaran ang ma-confine nga mga pasyente sa (RMPH) kag iban nga mga pampubliko nga ospital sa probinsiya.
Nagalaum man si Contreras nga magluwas sa P5 milyones nga inisyal nga pondo sang Malasakit Center, madugangan pa ini tagsa ka bulan.
