MANILA, Philippines – Nagpanawagan si Senadora Risa Hontiveros sang imbestigasyon sang Senado batok sa Roblox kag iban pa nga online video game platforms agud maprotektahan ang kabataan sa virtual nga espasyo.
Sa Senate Resolution No. 357, ginmandu niya ang senate committee on women, children, family relations, and gender equality nga magpatigayon sang imbestigasyon kag maglatag sang mga polisiya pareho sang mandatory age verification kag child safety standards.
Ini nga tikang naghalinan sa kabalaka sang mga otoridad matapos madiskubre ang plano sang pito ka teenagers halin sa Calabarzon nga mag-atake sa eskwelahan, nga gin-alegar gin-inspirar sang mga violent nga video games.
Samtang, ginpaandaman sang Department of Information and Communications Technology (DICT), ang Roblox bangod sa mga report sang child safety violations, lakip na ang grooming sang mga menor de edad.
Ginpahayag sang DICT nga kun indi magpatuman ang platform sang igo nga child safety systems, posible ini nga limitahan ukon suspendihon sa Pilipinas.
