Ginpahayag sang Akbayan nga handa sila nga ihatag ang bug-os nga suporta kay Senator Risa Hontiveros sa tion nga magpadalagan ini bilang presidente sa 2028.
Suno sa partido, isa si Hontiveros sa mga lider nga mahimo makabulig sa pagbangon kag pag-ayo sang pungsod tuga sang krisis sa panggobyerno, kapigaduhon, kag pagkadismaya sang publiko sa gobyerno.
Nauna na nga nagpahayag si Hontiveros nga bukas siya sa pagdalagan sa pagka-presidente kun siya ang pilion nga standard-bearer sang oposisyon sa masunod nga eleksyon.
Posible nga makaatubang niya sa 2028 si Vice President Sara Duterte nga nauna na nagpahayag sang iya plano nga magdalagan sa 2028 election.
Ginakabig ang Bise Presidente nga isa sa mga mabakod nga posible nga kandidato sa pagka-presidente.
