Ginpuna ni Sen. Imee Marcos ang mga irrigation project sang National Irrigation Administration (NIA) nga dugay na nga wala nagapangandar, sa tunga sang deliberasyon sa 2027 budget sang ahensya.
Ini may kaangtanan sa report sang Commission on Audit (COA) parte sa mga patubig nga wala nagamit kag nagaabot sa sobra 46,000 ektarya. Ginpangayo ni Marcos ang klaro kag may deadline nga plano para sa pag-rehabilitate sang mga naguba nga pasilidad.
Suno kay NIA Administrator Eduardo Guillen, naguba ang mga proyekto bangod sa mga kalamidad kag nadelay ang pagkay-o bangod sa kakulang sang Quick Response Fund (QRF).
Ginpamatukan ni Marcos ini nga rason kag ginpahayag nga may yara man sang Maintenance and Other Operating Expenses (MOOE) nga pondo para sa maintenance kag repair.
Suno sa NIA, padayon na ang pagkay-o sang mga proyekto agod magamit liwat sang mga mangunguma sa nagkalain-lain nga rehiyon.
Ginpangayo man ni Marcos sa NIA kag COA ang kompleto nga report kag opisyal nga dokumento parte sa kahimtangan sang mga irrigation system, lakip ang mga alegasyon sang non-compliance sa Procurement Law sang pila ka regional offices.
