MANILA, Philippines – Ginpahayag ni Senator Rodante Marcoleta nga padayon siya sa pagbulgar sang anomalya sa mga flood control projects bisan pa man kon arestuhon ukon mapriso siya.
Sa isa ka video message nga ginpaguwa pagkatapos sang pagtapok sang 18 ka anay kaupod sang anay kongresista nga si Zaldy Co, gin-angkon ni Marcoleta nga posible nga may warrant of arrest nga ipaguwa batok sa iya sa masunod nga inadlaw.
Suno sa senador, ang mga testimonya sang mga nagtambong kuntani ipresentar sa katapusan nga hearing sang Senate Blue Ribbon Committee may kaangtanan sa ginapatihan nga iregularidad sa flood control projects.
Apang wala natuman ang hearing sang Hunyo 11 bangud sang ginreport nga security threat sa Senado, gani ginpili sang testigo nga ipabuyagyag ini sa publiko ang ila alegasyon.
Nag-abot ini bisan pa sang pagbag-o sa liderato sang Senado sang Hunyo 3, nga nagresulta sa pagpungko ni Senator Erwin Tulfo bilang chairperson sang Blue Ribbon Committee.
Pahayag pa ni Marcoleta nga ginhimo siya nga target sang ginatawag niya nga hinimo-himo nga kaso bangud sang iya pagpakigbahin sa issue.
Nagguwa ang iya pahayag matapos mag-isyu ang Sandiganbayan sang precautionary hold departure order batok sa iya kag sa iban pa nga personalidad may kaangtanan sa reklamo nga plunder kag indirect bribery nga nagalakip sa ginapatihan nga P75 milyon nga campaign donations.
Sa pihak nga bahin, ginrekomendar sang Office of the Ombudsman ang pagpasaka sang kaso batok sa respondent, samtang ginpahayag ni Ombudsman Jesus Crispin Remulla nga ang ebidensya batok kay Marcoleta naghalin sa iya mismo nga pahayag parte sa kontribusyon nga iya nabaton sang eleksyon sa tuig 2025.
Ginpanginwala naman ni Marcoleta ang akusasyon kag ginlaragway ang reklamo batok sa iya bilang isa ka tikang agud pabudlayan ang mga inosente.
