Gin-athag ni Senador Robin Padilla nga ang iya pahayag nga “I am a Communist” nagatumod sa pagpasanyog sang social justice kag indi sa armado nga paghimakas.
Ginhimo sang senador ang paathag matapos nakakuha sang nagkalain-lain nga reaksyon ang iya kontrobersyal nga pahayag.
Suno kay Padilla ang ginatumod niya ang komunismo amo ang daan nga sistema nga nauna pa sa ideolohiya ni Karl Marx.
Ginhatagan pagtamod sini niya nga ang iya bersyon sang komunismo nabase sa pag-ulikid sa isa kag isa, pagkapatas, kag pagbinuligay sang mga tawo.
Gin-angot niya ini sa paagi sang pagkabuhi sang una nga mga Kristiyano ukon Christian Communism kag sang una nga mga Muslim sa Madinah ukon sistema sang Mu’akhat nga nagapakita sang matuod nga pag-ambit sang propiedad.
Dugang pa sini nga wala niya ginapatuhuyan ang Marxista-Leninista kag Maoista nga mga ideolohiya nga ginduso nanday Vladimir Lenin kag Mao Zedong nga nagtuga sang armado nga rebolusyon kag lapnagon nga kalakasan sa kalibutan.
Ang kontrobersyal nga pahayag ang una nga ginpaguwa ni Padilla samtang ginapamangkot ang isa ka testigo sang prosekusyon angut sa “Operation Romanov” sa ika-lima nga adlaw sang impeachment trial ni VP Sara Duterte.
