Ginhangkat ni Senator-judge Robin Padilla ang piskalya nga imbestigaran man ang lifestyle sang mga mamalidha sa Kamara, partikular ang mga gina-alegar nagapanag-iya sang malahalon nga mga salakyan nga nagabalor sang P16 million tubtub P22 million.
Ginhimo ni Padilla ang pahayag matapos gin-istoryahan sang prosekusyon ang pagbakal kay Atty. Manases “Mans” Carpio sang sapatos nga nagabalor sang P256,882 sa Malaysia.
Nangin kabahin ini sang pagkwestyon sa simple nga estilo sang pagpangabuhi nga ginapaabot sa mga opisyal sang gobyerno, suno sa mga probisyon sang Konstitusyon.
Sa tunga-tunga sang pagbayluhanay, ginkwestyon ni Padilla kun ngaa nasentro ang atensyon sa pagbakal sang sapatos samtang may mga mamalidha man nga nagagamit sang salakyan nga nagabalor sang minilyon ka pesos.
Ginpakigbahin man sang senador nga sang damlag lang nakagasto siya sang mas o menos P900,000, lakip na ang bulig nga iya ginhatag sa mga biktima sang pagpangluthang sa Tacloban kag South Cotabato.
Ginpanindugan sang senador, dapat patas man ang evaluation sa lifestyle kag spending sang mga opisyal sang gobyerno, ano man ang ila posisyon.
