MANILA, Philippines – Nagpahayag sang “Ironic”, si Senator Robin Padilla matapos ang pag-mention sa iya kag Senator Christopher Lawrence “Bong” Go ni anay Public Works Secretary Manuel Bonoan bilang mga senador nga may priority project lists nga ginsumite sa Department of Public Works and Highways ukon “DPWH”.
Sa pagtestigo ni Bonoan sa Sandiganbayan Third Division, iya ginpahayag nga si anay DPWH Undersecretary Roberto Bernardo ang nagsumite sang priority project lists kanday Go kag Padilla may kaangtanan sa ginatawag nga “Leadership Fund”, sang ahensya.
Pahayag pa ni Sen. Padilla, may pila sa iya kag kay Sen. Go nga mga proyekto nga ginmarkahan nga “For Later Release”, nga suno sa iya nagakahulugan nga wala ini sang pondo.
Samtang, ginpamangkot si Bonoan ni Associate Justice Karl Miranda kun may mga senator nga direkta nga nagpalapit sa iya parte sa ila mga proyekto, kag iya ginsabat nga mahimo ang ila staff ukon si Bernardo ang nagakadto.
Ginhingalanan man ni Bonoan ang anay senator nga sanday Ramon “Bong” Revilla Jr. kag Jinggoy Estrada bilang may priority project lists nga ginsumite ni Bernardo.
Pahayag ni anay DPWH secretary, tanan nga senator sang 2024 may yara sang indi magnubo sa P500 million nga allocation para sa priority projects sa idalom sang DPWH “Leadership Funds”, samtang ang mga chairperson sang major committees mahimo makabaton sang indi magnubo sa P1 billion.
Sa karon si Bonoan naghatag sang mga testimonya bilang prosecution witness sa kaso batok kay anay Senator Ramon “Bong” Revilla Jr..
