Ginkwestyon ni Senator Pia Cayetano ang legalidad sang sesyon sang Senado nga gintambungan sang 12 ka mga senador kag nagapanindugan nga indi bastante ang amo nga numero agud makaporma sang quorum kag makahiwat sang official session.
Suno kay Cayetano, maathag ang probisyon sang 1987 Constitution nga nagasiling nga ang Senado ang ginabug-usan sang 24 ka mga miyembro kag kinahanglan ang majority sa kabug-usan sini nga numero agud makahiwat sang official session.
Ginmensyonar man sini ang nagaluntad nga Senate Rules nga nagasiling nga ang mga Senate officers ang dapat mapilian paagi sa majority vote sang tanan nga miyembro sang senado.
Gintumod man ni Cayetano ang kaso ni Avelino vs Cuenco nga suno sa iban ginagamit nga basehan agud makabig nga bastante na ang 12 ka mga senador agud magporma sang majority.
Dugang pa ni Cayetano, indi makabig nga majority ang 12 ka senador sa senado nga may yara sang 24 ka mga miyembro.
