Ginkakibot ni Senator-Judge Raffy Tulfo ang nangin pahayag ni anay LandBank DepEd branch manager Nenita Camposano nga wala sila sang ginahawiran nga dokumento nga makapamatuod nga si Edward Fajarda ang awtorisado nga special disbursing officer (SDO) sang DepEd sang si Vice President Sara Duterte pa ang nagapungko nga tiglikom sang ahensya.
Suno kay Camposano, nagpakilala lang si Fajarda bilang payee kag nagpakita lang ini sang iya identification card sang natabo ang transaksyon kun sa diin dalagkuan nga kantidad sang kwarta ang gin-encash ni anay Special Disbursing Officer Edward D. Fajarda.
Didto na kag ginkwestyon ni Tulfo kun ngaa ginpasugtan ang transaksyon ni Fajarda, apisar nga wala siya sang ginpresenta nga dokumento nga nagapamatuod nga awtorisado ini nga SDO.
Ginpakigbahin ni Tulfo nga sa idalum sang pagsulundan sang Commission on Audit, bise presidente ukon ang authorized personnel lang ang may gahum nga magbatun ukon magkuha sang nasambit nga pondo.
Apang ginklaro man ni Camposano nga gin-honor ang tseke kay Fajarda bangud sya man ang nakabutang nga payee sa dokumento.
Naghatag man sang paathag si House Prosecutor Rep. Joel Chua nga wala sang ihibalo si Camposano sa ginpahayag nga dokumento kag magapresentar man ang prosekusyon sang iban nga testigo nahanungod sa nasambit nga disbursement.
