Ginkwestyon ni Senator Robin Padilla kon ngaa kinahanglan nga tun-an ang radicalization sang internet bangud ginakabig na ini nga delikado sang iban nga progresibo nga pungsod sa paminsaron sang mga pamatan-on.
Sa isa ka Facebook post, ginpahayag ni Padilla nga madugay na nga biktima sang political, religious, kag ideological extremism ang mga pamatan-on.
Suno sa senador, mahapos nga mahaylo ang mga kabataan bangud sa ila lamharon nga edad ilabi na pinaagi sa online platforms.
Ginpanindugan ni Padilla nga dapat himuon nga basehan ang tikang sang iban nga pungsod agud maproteksyunan ang mga kabataan sa posible negatibo nga epekto sang social media.
Kaangot sini, liwat nga ginsulit ni Padilla ang iya ginaduso nga Children’s Safety in Social Media Act nga nagatuyo nga mapabaskog ang proteksyon sang mga menor de edad batuk sa peligro sang internet.
Una na ginpahayag ni Padilla nga magluwas sa isyu sang juvenile justice, importante man nga istoryahan ang papel sang social media sa paghulma sang pamatasan kag panan-awan sang mga pamatan-on.
