Liwat nga ginaduso ni Senator Robin Padilla ang proposal nga amyendahan ang Juvenile Justice and Welfare Act agud mapanubo sa 10 ka tuig ang minimum nga edad sang criminal responsibility para sa mabug-at nga krimen.
Ginhimo ni Padilla ang panawagan kasunod sang mga insidente nga naga-involve sang mga menor-de-edad, lakip na ang pagpangluthang sa San Jose National High School sa Tacloban City nga nagpatay sa tatlo ka mga estudyante kag lima naman ang pilason.
Suno sa senador, nagataas na ang mga kaso sang kalakasan nga naga-involve sa mga pamatan-on gani kinahanglan ang mas madasig nga aksyon.
Nagpabutyag man ini sang pagkadismaya sa mahinay nga pag-uswag sang hagna sa senado, kadungan sang pagpasalamat sa pagpasar sang hagna nga nagadeklara sang waling-waling bilang national orchid nga iya co-author.
Samtang, nagapabilin naman nga nagapamatok ang mga child rights advocates kag eksperto sa nasambit nga hagna kag nagapanindugan nga mas maayo ang pagpabakod sang subong nga juvenile justice system kon ipaanggid sa pagpanubo sang edad sang kriminal nga responsibilidad.
