Ginpakamalaut ni Senate Committee on Energy Chairman Erwin Tulfo ang madasig nga pagpatuman sang pagsaka sang presyo sang mga produktong petrolyo kasunod sang pagsaka sang presyo sini sa global market, samtang ginatudlo nga madugay naman antes mapatuman ang price rollback ukon pagpanubo sang presyo.
Ginpahayag ni Tulfo ang iya pagkabalaka sa hearing sang Senado parte sa mga isyu sa sektor sang enerhiya, kun sa diin ginpamangkot niya kun may gahom ang gobyerno nga masiguro nga makatarunganon ang pagtalana sang presyo sang mga kompanya sang langis.
Suno sa senador, kinahanglan klaruhon kun ngaa madasig nga ginapatuman ang pagsaka sang presyo, bisan nga ang mga produktong petrolyo nga ginabaligya pa sa mga gasolinahan mahimo nga nabakal sa mas barato nga presyo.
Ginpamangkot man niya kun ngaa indi anay maubos ang mas barato nga stock sang langis antes ipatuman ang bag-o nga presyo, kag kun paano ginkuwenta ang mga pagbag-o sa presyo sang petrolyo.
Bisan ginakilala ang market-driven pricing system, ukon sistema sang pagtalana sang presyo suno sa kahimtangan sang merkado, ginpabutyag ni Tulfo nga kinahanglan man protektahan ang mga konsumidor batuk sa sunod-sunod nga pagsaka sang presyo.
May kaangtanan ini sa mga panugyan nga repasuhon ang Oil Deregulation Law agud mapalig-on ang transparency sa pagtalana sang presyo sang mga produktong petrolyo kag mapabakod ang papel sang gobyerno sa pagpanalipod sa mga konsumidor.
