Magabalik ang sesyon sang Senado sa Lunes, Nobyembre 9, pagkatapos sang halos isa ka bulan nga recess, sa diin ang mayor nga agenda nagalakip sang deliberasyon sa ginaduso nga ₱7.2-trillion national budget para sa 2027 kag ang pagpadayon sang impeachment trial kay Vice President Sara Duterte.
Ini suno sa Senate Concurrent Resolution No.13 nga ginpabakod sang Agosto 3, 2026, nga nagtalana sang Nobyembre 9 bilang pagsugod sang ikaduha nga regular nga sesyon sang ika-20 nga Kongreso.
Natalana man nga magapadayon sa amo nga adlaw ang impeachment proceedings batok kay Duterte. Suno sa schedule nga ginplastar ni Impeachment Court Presiding Officer Francis “Chiz” Escudero, may yara sang hearing sa bug-os nga bulan sang Nobyembre, lakip na ang full-day hearing humalin alas 10 sang aga tubtob alas 6:30 sang gab-i sa Nobyembre 10, 12, 13, 19 kag 20.
Temporaryo nga i-suspend ang proceedings sa Nobyembre 9 las 3 sang hapon agud tugutan ang plenary session sang Senado antes magbalik. Posible man nga ipatuman ang amo man nga arrangement sa Nobyembre 11 kon kinahanglanon.
Wala naman sang trial sa Nobyembre 30 bilang pagdumdom sang Bonifacio Day.
Samtang ang budget interpellation para sa proposed 2027 national budget ang magasugod sa Nobyembre 23 tubtub Disyembre 2. Target ini nga maaprubahan sa second reading sa Disyembre 3 kag sa third reading sa Disyembre 7.
Ang bicameral conference committee deliberations ang natalana sa Disyembre 10 tubtob 12, antes ang bicameral report pirmahan sa Disyembre 21 kag ratipikaran sang Kongreso sa Disyembre 22.
