Ginatun-an na sang Senado ang posibilidad nga pormal nga ipatuman ang “no-work, no-pay” rule para sa mga senador nga naga-absent sa trabaho nga wala sang permiso, suno kay Sen. Panfilo “Ping” Lacson.
Suno kay Lacson, madamo sa mga senador ang nagasuporta sa pag-amend sang Senate rules agud may yara sang opisyal nga mekanismo para suspindihon ukon untatan ang suweldo kag allowance sang mga miyembro nga may unauthorized absence.
Siling niya, indi igo nga boluntaryo nga indi pagkuhaon sang isa ka senador ang iya suweldo samtang naga-absent ini sa trabaho.
Kinahanglan, suno sa senador, nga may pormal nga abiso sa Land Bank of the Philippines kag sa Treasury agud opisyal nga masuspinde ukon mahold ang pagbayad sang suweldo sa nasambit nga senador.
Nagdangat ini sa diskusyon kasunod sang malawig nga pagabsent ni Sen. Ronald “Bato” Dela Rosa, nga wala na nagasulod sa Senado halin pa sang Nobyembre 2025, luwas sa pila ka adlaw sang Mayo.
Base sa mga nagpagwa nga report, boluntaryo nga wala nagabaton si dela Rosa sang iya suweldo kag allowance samtang wala ini nagasulod sa Senado.
Nagpanago si dela Rosa matapos magpagwa sang arrest warrant batok sa iya ang International Criminal Court ukon ICC.
Samtang, ginpahayag ni Lacson nga ang gapanguna nga problema gilayon nga paga-aksyonan sang Senado amo ang gutok nga schedule sini.
Luwas sa regular nga trabaho sa legislative, okupado man ang mga senador sa pag-usisa kag pagpreparar para sa pagpasa sang 2027 national budget, kag ang impeachment trial batok kay Vice President Sara Duterte.
Bangud sini, indi pa suno kay Lacson ma-schedule ang ethics hearing nga mahimo magtalakay sa amo nga isyu.
