Ginpabakod sang Senado ang isa ka resolusyon nga nagapangabay sa International Criminal Court (ICC) nga ipaidalum sa house arrest si anay Presidente Rodrigo Duterte, bangud sa iya edad kag nagkalain-lain nga kondisyon sang lawas.
Ginpahayag nga humanitarian reason ang sa likod sang resolusyon, nga ginaduso para maprotektahan ang physical kag mental health sang anay presidente.
Ang Senate Resolution No. 144 ginpirmahan nanday Senate Majority Leader Juan Miguel Zubiri kag Senate Minority Leader Alan Peter Cayetano, kag nagboto pabor ang 15 ka mga senador, 3 ang wala nagpabor, kag duha ang nag-abstain.
Ginalakipan ang resolusyon sang panawagan nga sa baylo nga presuhon si Duterte, dapat ipaidalum na lang ini sa house arrest kon mapamatud-an sa medical exam nga indi na siya makasarang sa regular nga detensyon.
Gin-emphasize man sang mga senador nga ang ICC may mga kondisyon nga mahimo ipatuman sa house arrest, pareho sang pag-istar sa isa ka lugar, paglikaw sa kontak sa mga testigo, kag pagtuman sa mga kasuguan sang korte.
Suno kay Zubiri, personal ini nga desisyon niya bilang isa ka anak sang may edad nga amay, kag wala ini labot sa politika.
Samtang, si Senator Risa Hontiveros ang isa sa mga nagkontra sa resolusyon kag nagpanindugan nga wala sang indikasyon nga ginapabay-an sang ICC ang ikaayong lawas sang ila mga detainees.
Ginpabutyag man niya nga seryoso ang mga alegasyon sang human rights violations sa ginlunsar nga war on drugs sa panahon ni Duterte, kag kinahanglan lang padayonon ang hustisya para sa mga biktima.
