Nagalaum ang Senado nga mapadasig ang impeachment trial batuk kay Vice President Sara Duterte agud nga indi maatrasar ang paghinun-anon sa 2027 national budget, priority bills kag iban pa nga imbestigasyon.
Suno kay Senate President Sherwin Gatchalian, ginahingyo sa prosekusyon kag depensa nga padasigon ang schedule sang trial pinaagi sa pagpanubo sang mga trial days kag mga witness nga may pareho lang nga testimonya.
Ginbuyagyag man sini nga indi makadikta ang impeachment court sang estratehiya sang duha ka kampo, apang nagapanawagan sang episyente nga pagpresentar sang mga ebidensya kag mga testigo.
Samtang, pagahimuon naman ang mga opening statement sang prosekusyon kag depensa sa pagbukas sang impeachment trial, antes maresolbar sang mga senador-judges ang mga isyu nga nabilin sa pre-trial conference.
Ginalauman nga magasugod sa Martes ang aktwal nga presentasyon sang mga testigo kag ebidensya, samtang nagkasugot naman ang duha ka kampo nga sarang gamiton sa hearing ang Filipino, English kag Taglish agud mas mahangpan sang publiko ang proseso.
