Nagapreparar na ang Senado sa pagbukas liwat sang imbestigasyon ‘in aid of legislation’ angut sa flood control scandal, Lunes, Enero 19.
Hiwaton ang hearing samtang naka-break Kongreso, base sa motu proprio authority sang Senate Blue Ribbon Committee nga una nga gintugyanan sang hearing sa malapnagon nga corruption scandal. magasugod ang hearing takna ala una sang hapon.
Ginpahayag ni Senate President Vicente Sotto III nga ginhingyo sini sa Department of Public Works and Highways (DPWH) nga maghatag sang pila ka opisyal kag importante nga mga dokumento pinaagi sa subpoena duces tecum nga ginalauman nga makabulig sa mas madalom nga imbestigasyon.
Kabahin ini sang handom sang komitiba nga matingob ang tanan nga mga file may kaangtanan sa flood control scandal, lakip na ang kontrobersyal nga mga file sang Cabral.
Ginkumpirmar man ni committee chair Sen.Panfilo Lacson nga ang iya komitiba may kaugalingon nga kopya sang nasambit nga mga files. Ang nasambit nga kopya yara na sa posisyon sang komitiba antes ang pinal nga desisyon nga buksan liwat ang imbestigasyon.
Una na nga ginkumpirmar ni Sotto nga nagpirma siya sang 12 ka mga subpoena para sa mga dalagku nga personalidad, lakip na ang mga masunod:
Former DPWH Secretary Manuel Bonoan
Former Rep. Zaldy Co
Former DepEd Usec Trygve Olaivar
Former COA Commissioner Mario Lipana
Former DPWH Director Gerald Opulencia
Former DPWH Director Gerald Pacanan
Maynard Ngu
Orly Guteza
John Paul Estrada
Mark Teksay
Arjay Domasig
Carleen Yap-Villa.
Magluwas kanday Co kag Bonoan nga lunsay kumpirmado nga yara sa luwas sang pungsod, wala pa sang kumpirmasyon kun makatambong ang napulo pa ka iban nga ginpadal-an man sang subpoena.
