Nagpatuman sang mas hugot nga seguridad ang Senado kadungan sang deadline sa pagsumite sang sabat ni VP Sara Duterte sa Articles of Impeachment subong nga adlaw.
Suno sa abiso, mahimo lamang magsumite sang sabat si VP Sara tubtob alas 7 sang gab-i, sa personal man, paagi sa abogado, ukon paagi sa electronic mail.
Ginalauman man nga magasugod ang impeachment trial sa Hulyo 6, sa diin nagapangatubang si Duterte sang kaso nga culpable violation of the Constitution, graft and corruption, kag betrayal of public trust.
Bangud sa ginalauman nga pagdugok sang media kag mga taga-suporta ni Duterte, nagpatuman man ang Office of the Senate Secretary sang guidelines para sa media coverage kag nagdesignar sang mga lugar kun sa diin mahimo hiwaton sang press briefing sang kampo ni Duterte.
Suno sa Senado, ang mga tikang ang nagatuyo nga mapasiguro ang matalunsay, luwas kag epektibo nga proseso sang pag-file samtang ginahatagan man sang nagakaigo nga access ang media sa mga importante nga hitabo.
Nag-coordinate naman ang National Capital Region Police Office (NCRPO) sa Office of the Sergeant-at-Arms agud masiguro ang katawhay sa palibot sang Senado.
