Naghalin ang mga senador sa pagpanguna ni Senate President Sherwin Gatchalian sa ila mga partido pulitikal agud unahon ang pinakaimportante nga kinahanglanon sang mga Pilipino nga naapektuhan sang magnitude 7.8 nga linog sa Mindanao.
Sa pagbukas sang First Special Session sang 20th Congress kahapon, nag-isa ang tanan nga senador sa pag-aprubar sang Resolution No.49 nga nagapanawagan sang nagakaigo nga pondo para sa relief, recovery kag rehabilitation sang mga lugar nga apektado sang kalamidad sa Mindanao.
Ginduso man sang Senado ang Resolution No. 50 nga nagapabutyag sang daku nga pagpasalamat sa mga rescue workers, personnel sang social welfare and healthcare sector, local government units, uniformed services, volunteer groups kag iban pa nga humanitarian responders bangud sang ila madasig nga pagresponde kag pagbulig sa mga komunidad nga apektado sang linog.
Samtang, gin-aprubahan man sang Senado ang reconciled version sang hagna nga nagapabaskog sang implementasyon sang Universal Access to Quality Tertiary Education Act agud padayon nga mahatagan sang dekalidad kag mas accessible nga tertiary education ang mga estudyante.
Sa ikatatlo nga pagbasa, gindeklarar sa Waling-Waling ang gin-aprubahan sang kamara nga Senate Bill No.2092 bilang opisyal nga national orchid sang Pilipinas. Gin-aprubahan man ang House Bills para sa naturalization sang mga atleta nga sanday Bennie Francois Boatwright III kag Matthew James Ramos.
Sa ikaduha nga pagbasa, ginpasar sang Senado ang importante nga mga proposal lakip na ang Agricultural Cooperatives Act, Agricultural and Fisheries Extension Act kag Magna Carta of Barangay Health Workers.
Suno sa Senado, ini nga mga tikang ang kabahin sang padayon nga pagtinguha sang gobyerno agud masabat ang nagapadayon nga krisis sa Mindanao kag mapasanyog ang serbisyo sa sektor sang edukasyon, agrikultura kag ikaayong lawas sa bug-os nga pungsod.
