Suspendido ang duty kag session sa Senado subong nga adlaw, agud tugutan ang pagpanglimpyo kag assessment kasunod sang sunog nga nagluntad sa building.
Ang mga empleyado gikan sa security, maintenance, kag general services nga pirme naga-duty agud masiguro ang kaluwasan kag kahusay sa sulod sang compound ang wala ginasakop sang suspension.
Ginpasalig naman ni Senate President Vicente “Tito” Sotto III nga wala sang importante nga dokumento nga naguba bangud sa insidente.
Suno sa Bureau of Fire Protection (BFP), nag-umpisa ang kalayo sa ikaduha nga panalgan sang building kag gilayon nga napalong matapos ang masobra isa ka oras nga operasyon sang mga bombero.
Base sa inisyal nga report, ginabanta sa P1.2 million ang kahalitan sang pila ka mga opisina kag kagamitan.
Padayon pa ang imbestigasyon sang BFP kag Senate Sergeant-at-Arms agud mahibaluan ang gintunaan sang sunog kag ang kabug-usan nga kadakuon sang kahalitan.
Nagpanawagan ang pamunuan sang Senado sa publiko nga magpabilin nga kalmado kag ginpasalig nga magapadayon ang ila mga aktibidad sa tion nga matapos ang pagpanglimpyo kag masiguro ang kaluwasan sang nasambit nga building.
