ROXAS CITY – Ginakabig ni Senator Ronald ‘Bato’ dela Rosa nga useless ukon wala sang pulos ang pagtambong sa imbestigasyon sang Kamara sa war on drugs sang anay Duterte administration.
Para kay Dela Rosa, nagauyang lang sang oras ang pagtambong sa hearing sang Kamara bangud balik-balik lang ang mga pamangkot kag balik-balik man ang sabat.
Pagpanghangkat sang senador nga kun may nagakaigo nga ebidensya, magpasaka na lamang sang kaso batuk sa ila.
Nagapati naman ang mamalidha nga “politically motivated” ang pagbuhi sang Kamara sa imbestigasyon angut sa war on drugs sang administrasyong Duterte. Pahayag pa sini nga may gusto nga “mag-pin down” ukon ilabi nga ipiton si anay Presidente Rodrigo Duterte sa mga kaso nga sini nga ginapangatubang sa International Criminal Court (ICC).
