ROXAS CITY – Ginhinyo ni Senator Sherwin Gatchalian nga gilayon nga pasabton si suspended Bamban,Tarlac Mayor Alice Guo ukon mas kilala na sa karon nga si Guo Hua Ping.
Ini matapos ginkumpirmar sang National Bureau of Investigation (NBI) nga pareho ang fingerprints nanday Mayor Guo kag Guo Hua Ping, pamatuod nga isa lamang ini ka persona.
Suno kay Gatchalian, indi dapat pagbalewalaon ang pagtamay ni Guo Hua Ping sa layi sang Pilipinas kag dapat nga manabat ini sa labing madali nga panahon.
Ginpahayag sang senador nga ang “matching fingerprints” ang nagapamatuod nga matuod ang ila madugay na ginasuspetsahan nga isa lang ka persona si Mayor Guo kag Guo Hua Ping kag isa ini ka Chinese citizen kag indi Pilipino.
Dugang pa sini nga ang pareho nga fingerprints, mga dokumento nga Special Investor Residence Visa (SIRV) nga ginhatag sa iloy sini nga si Lin Wen Yi, kag ang mga records sang mga byahe nila nagikan sa Bureau of Immigration (BI) ang nagapakita sang mapag-on nga ebidensya sang pagpanunto agud matuman ang mga malain nga hilimuon.
