Ginpanindugan ni Senador Jinggoy Estrada nga gamiton niya ang tanan nga legal remedies may kaangtanan sa kaso nga ginpasaka batuk sa iya sa Sandiganbayan.
Suno sa senador, ginapreparar na sang iya mga abogado ang katumbas nga tikang agud mapakita ang ginaalegar iregularidad sa proseso kag ebidensya nga ginaalegar wala nahatagan sang bastante nga konsiderasyon.
Lakip suno sa iya ang sulat halin sa Senate Legislative Budget Research and Monitoring Office ukon LBRMO nga nagapahayag nga wala sang record nga may ginhimo siya nga insertion sa 2025 national budget.
Ginpanindugan man ni Estrada nga wala siya nahatagan sang nagakaigo nga kahigayunan nga tun-an ang mga resolusyon sang Department of Justice kag sang Ombudsman antes ginpasaka ang kaso, bagay nga suno sa iya may implikasyon sa iya right to due process.
Ginsambit man sang senador nga ginpadasig ang pag-uswag sang mga kaso batok sa pila ka mga katapo sang majority bloc matapos ang pagbag-o sang liderato sa senado.
Sa pihak sini, ginpahayag ni Estrada nga padayon niya nga pangitaon ang kamatuoran kag depensahan ang iya ngalan sa nagakaigo nga forum kag sandig sa kasuguan.
